Bu gün Geta İcma Mərkəzinin açılışı olub. Mərkəz, əhaliyə geniş çeşidli xidmətlər və təlim imkanları təqdim edərək, cəmiyyətin inkişafına töhfə verməyi hədəfləyir. Açılışda iştirak edən vətəndaşlar mərkəzin fəaliyyət sahələri ilə tanış oldular.
Mərkəz, bir sıra təlim və kurslarla fərqli sahələrdə maarifləndirmə işlərini davam etdirəcək. Təklif olunan kurslar arasında gürcü dili, ingilis dili, rəsm, vətəndaş təhsili, media kursları və sahibkarlıq kursları yer alır. Bu kurslar, əhaliyə həm fərdi inkişaf, həm də peşəkar bacarıqlarını artırmaq imkanı yaradacaq.
Təlimlər sahəsində isə mərkəz, kənd təsərrüfatı, insan hüquqları, iqtisadi inkişaf və media savadlılığı kimi mövzularda proqramlar təklif edəcək. Bu təlimlər, iştirakçıların müasir dövrün tələblərinə uyğun biliklər əldə etmələrini təmin edəcək.
Geta İcma Mərkəzinin kitabxanası da əhaliyə geniş imkanlar təqdim edir. Kitabların oxunması, təhlili, müzakirələr və poeziya gecələrinin təşkili kimi fəaliyyətlər vasitəsilə mədəniyyət və təhsil sahəsindəki tələbatı qarşılamağa çalışacaq.
Bundan əlavə, mərkəz əhaliyə ödənişsiz xidmətlər də təqdim edəcək. Bunlara sənədlərin surətinin çıxarılması, kompüter xidmətləri, internetə çıxış və sənədlərin tərtibi və tərcüməsində köməklik daxildir.
Mərkəzin rəhbəri Günel Abdullayeva, gələcəkdə mərkəzin daha da inkişaf edərək, əhaliyə daha çox imkanlar yaratmağı planlaşdırdıqlarını bildirib. Mərkəzin açılışı, Geta icmasının sosial və mədəni həyatında mühüm bir mərhələdir və bölgənin inkişafına böyük töhfə verəcək.
