Litva Xarici İşlər Nazirliyi Gürcüstanda keçirilmiş seçkilərə münasibət bildirib.
Regionpress.ge xəbər verir ki, Litva XİN-in bəyanatına görə, Litva üçün Gürcüstandaki Parlament seçkiləri azad və ədalətli hesab etmək çətindir.
“26 oktyabrda Gürcüstanda keçirilən parlament seçkilərində misli görünməmiş sayda insidentlər və sistematik pozuntular müşahidə olundu, bu pozuntular həm seçkiqabağı kampaniya dövründə, həm də seçki günü baş verdi. Bunlara səslərin alınması ilə bağlı ittihamlar, seçki məntəqələrində fiziki zorakılıq halları, o cümlədən müstəqil müşahidəçilərə qarşı hücumlar və qorxutma, medianın işini məhdudlaşdırmaq üçün atılan addımlar və s. daxildir. Bununla yanaşı, ən narahatedici müdaxilə sübutu hakim partiyanın siyasi opponentlərinə qarşı kütləvi hücumlar, dezinformasiyanın seçki kampaniyasında sistematik istifadəsi və seçki proseslərində dövlət institutları və inzibati resursların istifadəsi ilə bağlıdır.
Bu pozuntular bir çox beynəlxalq və yerli müstəqil müşahidəçilər tərəfindən qeyd olunub. Bu pozuntuların miqyası və sistematik xarakteri, eləcə də müstəqil exit poll nəticələri ilə elan edilmiş nəticələr arasındakı ciddi uyğunsuzluq seçkilərin və onların yekun nəticələrinin legitimliyini ciddi şəkildə şübhə altına alır. Gürcüstan prezidenti nəticələri tanımaqdan imtina edib.
Bu şəraitdə Litva üçün bu seçkiləri azad və ədalətli hesab etmək çətindir.
Gürcü xalqının demokratik hüquqlarına hörmət edilməlidir. Bu hüquqları pozmaq cəhdi tamamilə qəbuledilməzdir. Biz tələb edirik ki, bu seçkilərdə və onların gedişatında bildirilən bütün pozuntularla bağlı müstəqil beynəlxalq araşdırma təcili olaraq aparılsın.
Biz inanırıq ki, Avropa İttifaqı Gürcüstanla siyasi əlaqələri kəsəcək və Gürcüstan hökumətinə qarşı maliyyə yardımını donduracaq. Bundan əlavə, seçki saxtakarlığına cavabdeh şəxslərə qarşı əlavə məhdudlaşdırıcı tədbirlər təxirə salınmadan nəzərdən keçirilməlidir.
Litva gürcü xalqı və onların Avropa seçimi ilə birlikdə dayanmağa davam edəcək. Biz həmçinin Gürcüstanın müstəqilliyinin, suverenliyinin və beynəlxalq aləmdə tanınmış sərhədləri çərçivəsində ərazi bütövlüyünün dəstəklənməsinə sadiq qalırıq” , – deyə Litva XİN-in bəyanatında qeyd olunub.
