Bəzi Avropa siyasətçilərinin zorakılığı sülh adlandırdığını gördük. Bu sülhdürsə, qoy, öz paytaxtlarınızda hər gün olsun.
Regionpress.ge xəbər verir ki, bunu jurnalistlərə açıqlamasında Gürcüstan parlamentinin sədri Şalva Papuaşvili deyib.
“Gürcü televiziyalarını açsınlar, onlar üçün də əlçatandır. Onlar videolara, Rustaveli prospektində baş verənləri, polislərə necə hücum edildiyini canlı izləyə bilərlər. Bu müddət ərzində 140 polis əməkdaşının yaralandığını bilirsinizmi? İnsanlara, o cümlədən “Birinci Kanal”ın operatoruna atılan daşlar, “Molotov kokteyli”, pirotexniki vasitələr – avropalıların bütün bunları sülh və dinc nümayiş adlandırması ayıbdır. Bu, bir daha sübut etdi ki, bəzi xarici aktorlar reallıqdan nə qədər qaçırlar və bəziləri gürcü xalqından öz seçimini almaq istəyirlər və bunun üçün hər şeyi edirlər”, – Papuaşvili bildirib.
