İşğal olunmuş Abxaziyaya “Rusiya investisiyaları üçün güzəştli şərtlər” haqqında sözdə saziş layihəsi bu gün səsə qoyulmalıdır.
Regionpress.ge xəbər verir ki, yerli sözdə müxalifət de-fakto hökuməti məsələni “növbəti prezident seçkilərinə qədər” təxirə salmağa çağırır.
Sözdə Müxalifət təmsilçilərindən biri Adqur Ardzinbanın Telegram kanalında yazdığı kimi, “insanları parçalayan və cəmiyyəti narahat edən bütün qaynar məsələləri təxirə salmaq” lazımdır.
“Hökumət bununla razılaşmasa, yaxın günlərdə baş verə biləcək nəticələrə görə bütün məsuliyyəti Abxaziya prezidenti Aslan Bjaniya və onun ətrafı daşıyacaq”, – Ardzinba Telegram kanalında yazıb.
Onun bəyanatına görə, hökumətin fəalların saxlanmasını nəzərdə tutan hərəkətləri ictimai-siyasi vəziyyəti kəskin şəkildə gərginləşdirib.
Bu gün səsə qoyulacaq sazişdə investorun səkkiz il müddətinə gömrük rüsumlarından, habelə korporativ əmlak vergisi və mənfəət vergisindən azad edilməsi nəzərdə tutulur. İnvestor üçün əlavə dəyər vergisi cəmi beş faiz olacaq.
İşğal olunmuş Abxaziyada fikir ayrıdır. Bəziləri hesab edir ki, belə bir layihənin qəbulu iqtisadiyyata zərər verəcək və işğal olunmuş Abxaziyanın təhlükəsizliyinə təhlükə yaradacaq.
Müqavilə layihəsi ictimai etirazla qarşılanıb.
Bir neçə gün əvvəl mitinq iştirakçıları Dövlət Təhlükəsizliyi Xidmətinin binası yaxınlığında toplaşaraq oradakı darvazanı maşınla dağıdıblar. Prezidentin iqamətgahı yaxınlığında hərbi texnika yerləşdirilib. Daha sonra bir neçə nəfər həbs edilib və buna cavab olaraq aksiya iştirakçıları üç körpünü bağlayıblar. Daha sonra de-fakto hökumətin nümayəndələri məhbusları yaxın vaxtlarda azad edəcəklərini bəyan ediblər və bunun əvəzinə etirazçılar blokada olan üç körpüdən birini – Kodori körpüsünü açıblar.
