Bu gün Xankəndi şəhərində Qarabağ Universitetində tədris prosesi başladı. İlk mərhələdə kadr hazırlığı altı fakültədə aparılacaq: Pedaqoji, İncəsənət, Humanitar və Sosial Elmlər, İqtisadiyyat, Mühəndislik və Turizm fakültələri.
2024/2025-ci tədris ili üçün Qarabağ Universitetinə 1104 tələbə qəbul edilib, bu da qəbul planının 98,5 faizinin dolduğunu göstərir. Tələbələrdən 101 nəfər 600-dən çox, 385 nəfər isə 500-dən çox bal toplayıb. Hüquqşünaslıq ixtisası üzrə ən yüksək nəticə 683,8 bal olub. Olimpiada qalibi olan bir abituriyent Elektrik və Elektronika mühəndisliyi ixtisasına müsabiqədənkənar qəbul edilib. Ümumilikdə, universitetin I-IV ixtisas qrupları üzrə orta qəbul balı 467,6 olub. Bundan əlavə, ilk tədris ilində hüquqşünaslıq, xarici dil müəllimliyi (ingilis dili), maliyyə və mühasibat ixtisasları üzrə “SABAH” qrupları yaradılıb.
Hal-hazırda universitetdə 160 əməkdaş çalışır. Onlardan 60 nəfəri akademik, 100 nəfəri isə inzibati və texniki heyət üzvüdür.
