Tbilisi bələdiyyəsi 2025-ci ilin Milad və Yeni il bayramlarının qeyd edilməsi üçün 9,4 milyon laridən çox vəsait xərcləyəcək.
Sənədlərə əsasən, 2024-cü il dekabrın 13-dən 2025-ci il yanvarın 15-dək təchizatçı paytaxtın bir neçə küçəsində “Milad şəhərciyi” təşkil etməlidir.
Regionpress.ge xəbər verir ki, əsas şam ağacı parlament binasının qarşısında, Rustaveli prospektində, dekabrın 6-da (adətən dekabrın ortalarında) işıqlandırılacaq, 31 dekabrda isə Birinci Respublika Meydanında Yeni il qala-konserti keçiriləcək.
“Milad şəhərciyi” Qiorqi Atoneli, İtaliya, Xazini, Pxovi, Anton Purtseladze küçələri, həmçinin Deda Ena parkı və yaxınlığında qurulacaq.
Burada tematik dekorasiyalar, fotosahələr, buz meydançası, pavilyonlar, köşklər qurulacaq və mədəni, maarifləndirici və əyləncəli tədbirlər təşkil ediləcək. Bunlar arasında konsertlər, teatr tamaşaları, açıq kinoteatr və nağıl qəhrəmanlarının paradı da yer alacaq.
Bundan əlavə, yerli sahibkarları və qastronomiya sənayesini dəstəkləmək məqsədilə əl işlərinin sərgi-satışı ilə şirniyyat festivalı və Milad yarmarkası da keçiriləcək.
Əlavə olaraq, bələdiyyə ümumi dəyəri 858 370 lari olan üç elektron tender elan edib:
• Tədbirlərin təminatı (150 620 lari).
• Səhnələr, podiumlar, konstruksiyalar və döşəmə örtüklərinin təmin edilməsi (282 750 lari).
• Tədbirlər üçün audio avadanlıqlar (425 000 lari).
Bu il Tbilisidə Yeni il tədbirləri üçün ümumi büdcə təxminən 9,43 milyon lari təşkil edəcək.
