Avropa polisi mafiya sxemi ilə bağlı çirkli pulların yuyulması və vergi fırıldaqçılığı ilə bağlı istintaq çərçivəsində 43 nəfəri həbs edib. Bu barədə Avropa İttifaqı Prokurorluğu və İtaliya Polisi məlumat yayıb.
Səlahiyyətlilərə görə, istintaq İT məhsulları və elektron cihazların ticarətində vergi fırıldaqlarına aiddir və təxminən 400 şirkəti əhatə edir. İstintaqda əsasən İtaliya və bir sıra digər Avropa ölkələrində, həmçinin Birləşmiş Ərəb Əmirliklərində 200-ə yaxın şübhəli var.
Avropa İttifaqı Prokurorluğunun məlumatına görə, saxlanılan şəxslər ƏDV-dən yayınmaqla əldə etdikləri gəlirlə İtaliya mafiyasının fəaliyyətinə yardım etməkdə də şübhəli bilinirlər.
Regionpress.ge xəbər verir ki, həbs edilənlərdən 34-ü həbsdə, 9-u isə ev dustaqlığındadır. Daha dörd şübhəli barəsində həbs qətimkan tədbiri seçilib. Təqsirləndirilən şəxslər Çexiya, Hollandiya, İspaniya və Bolqarıstanda həbs ediliblər.
İstintaq çərçivəsində 2020-2023-cü illəri əhatə edən 1,3 milyard avro dəyərində saxta hesab-fakturalar aşkar edilib. 520 milyon avro məbləğində vəsaitə, həmçinin Siciliya və Liquriya sahillərində, Komo gölü və Milanda daşınmaz əmlaka həbs qoyulub. İtaliyada, eləcə də İspaniya, Lüksemburq, Çexiya, Slovakiya, Xorvatiya, Hollandiya, Bolqarıstan, Kipr, İsveçrə və Birləşmiş Ərəb Əmirliklərində onlarla ünvanda axtarış aparılıb.
