“Avropa İttifaqı institutları olaraq Gürcüstan hökumətinin nümayəndələri ilə bütün yüksək səviyyəli görüşləri dayandırmağa qərar verdik”.
Avropa İttifaqının Gürcüstandakı səfiri Pavel Qerçinski jurnalistlərə verdiyi açıqlamada bildirib ki, Aİ Gürcüstana yüksək səviyyəli səfərləri dayandırmaq və Brüsseldə Gürcüstan hökuməti rəsmiləri ilə yüksək səviyyəli görüşlər keçirməmək qərarına gəlib. Diplomatın sözlərinə görə, bu qərarın səbəbi Gürcüstan hökumətinin Aİ-yə qarşı sərgilədiyi ritorikadır.
“Bildirmək istəyirəm ki, artıq bu ilin iyun ayında üzv dövlətlərimizlə Gürcüstan hökumətinin Avropa İttifaqına qarşı qeyri-dost münasibəti ilə necə davranacağımızı müzakirə etdik. Həmçinin, Qərb əleyhinə və Avropa əleyhinə ritorika, təbliğat və konspirasiya nəzəriyyələri ilə necə mübarizə aparacağımızı müzakirə etdik və Avropa İttifaqı olaraq qərara gəldik ki, Gürcüstanın mövcud hökuməti ilə heç bir yüksək səviyyəli əlaqəmiz olmasın. Məhz bu səbəbdən, son aylarda Gürcüstana yüksək səviyyəli səfərlər baş tutmayıb və Brüsseldə Gürcüstan hökumətinin nümayəndələri ilə yüksək səviyyəli görüşlər olmayıb. Bir daha təkrar edirəm, Avropa İttifaqı institutları olaraq Gürcüstan hökumətinin nümayəndələri ilə bütün yüksək səviyyəli görüşləri dayandırmağa qərar verdik” , – deyə Pavel Qerçinski bildirib.
