Rusiya Ukraynada Rusiyaya qarşı döyüşən “Gürcüstan legionu”nu “terror təşkilatları” federal siyahısına daxil edib. Legionun özündə də Rusiyanın bu qərarı “Gürcüstan legionu”nun səmərəli fəaliyyətinin sübutu kimi qiymətləndirilir.
Kremlin nəzarətində olan qurumlar bu gün, iyunun 14-də Rusiyanın Federal Təhlükəsizlik Xidmətinin bəyanatını yayıb. Bəyanata əsasən, Cənub Dairəsinin hərbi məhkəməsi “dəlillərə əsaslanaraq, “Gürcüstan Milli Legionunun yarımhərbi birləşməsini” “terror təşkilatı” kimi tanıyıb.
“Bu, bizim səmərəli işimiz deməkdir, biz bunu davam etdirəcəyik və bu gün Gürcüstan legionu Rusiyada terrorçular siyahısına salınmasını mütləq qeyd edəcək”, – Legionun rəhbəri Mamuka Mamulaşvili “Azadlıq” radiosuna bildirib.
Rusiya Federal Təhlükəsizlik Xidmətinin bəyanatında o da qeyd olunur ki, “Gürcüstan legionu” 2014-cü ildə Ukrayna Müdafiə Nazirliyinin Baş Kəşfiyyat İdarəsinin “patronajı” altında yaradılıb və bu gün “ən böyük silahlı üzvləri Ukrayna Silahlı Qüvvələri ilə döyüş əməliyyatlarında iştirak edən və Rusiya ərazisində “təxribat-terror aktlarının təşkili, rus əsgərlərinə işgəncə verilməsi və dinc əhalinin öldürülməsi” ilə əlaqəsi olan milli simvolu olan birləşmədir”.
Rusiya İstintaq Komitəsi Mamuka Mamulaşvili və “Gürcüstan legionu”nun digər üzvlərinə qarşı muzdlu döyüşçülərin cəlb edilməsi və onların silahlı münaqişəyə cəlb edilməsi maddələri ilə cinayət işi açıb.
2024-cü ilin fevralında Moskvanın Basman rayon məhkəməsi Mamulaşvilini qiyabi həbs cəzasına məhkum edib.
Rusiya Federal Təhlükəsizlik Xidmətinin bəyanatına görə, “terror təşkilatı” kimi tanınmaq “Gürcüstan legionu” üzvlərinin “cinayətkar fəaliyyətini” Cinayət Məcəlləsinin “terror istiqaməti” maddələri ilə kvalifikasiya etməyə imkan verir.
